په نیمروز پوهنتون کې د «روشهای نوین تدریس» په نوم دوه ورځنی آنلاین کورس ترسره شو
زرنج، ۱۹ رمضان المبارک ۱۴۴۷ هـ ق/ ۲۰ حوت ۱۴۰۴ هـ ش
د نیمروز پوهنتون د ښوونې او روزنې پوهنځي له خوا د «روشهای نوین تدریس» تر سرلیک لاندې دوه ورځنی آنلاین کورس دایر شو. یاد کورس د یاد پوهنځي د الکترونیکي زده کړو کمېټې له لوري د څېړنې کمېټې په همکارۍ تنظیم او ترسره شو.
د دې روزنیز کورس موخه د استادانو د تدریسي مهارتونو لوړول، د تدریس نوې طریقې معرفي کول او د زدهکړې او تدریس په بهیر کې د عصري میتودونو کارول وو، تر څو د تدریس کیفیت ښه او اغېزمن شي.
په یاد کورس کې د ښوونې او روزنې پوهنځي استادانو فعال ګډون وکړ او د تدریس اړوند بېلابېل موضوعات تر بحث لاندې ونیول شول. د کورس تدریس او وړاندې کول د پوهنځي دوو تنو استادانو پوهنیار جلیل محمدي او پوهنیار صبغت الله رحیمي له لوري ترسره شو. نوموړو استادانو د تدريس د نويو میتودونو، محصل محوره تدریس، د ټکنالوژۍ کارونې او د اغېزمن تدریس اصولو په اړه تفصیلي معلومات وړاندې کړل.
د یادونې وړ ده چې د نیمروز پوهنتون د ښوونې او روزنې پوهنځي ریاست ژمن دی چې د استادانو د علمي او مسلکي ظرفیتونو د لوړولو لپاره ورته علمي او روزنیز پروګرامونه په دوامداره توګه تنظیم او ترسره کړي.
